Najorteqartitsinermut peqataalluartuuneq

Najortitut suliassaq pingaarutilik isumagisassarivat. Aalajangiinerit meeqqat inuusuttullu inuunerinut annertuunik kinguneqarsinnaasut pineqartillugit, meeqqat inuusuttullu – ilaanni tusaaniarneqartanngitsut – sinnerlugit oqaaseqartartunngussaatit. Tamanna suliassaavoq oqitsuinnaasanngitsoq. Ilinniarninni suliassap isumaginissaanut piareersassavatsigit. Tamatumanili pisariaqarpoq allatut suliavit iperarallarnissaat, aamma najorteqartitsisarnermik aaqqissuussinermi meeqqanik isiginneriaatsip atorneqartup akuersaarnissaa.

Najorteqartitsisarnermik aaqqissuussinerup iluani meeqqat piginnaaneqarluarlutik peqataasutut naapertuuttunillu isummersuuteqarlutillu misilittagaqartutut isigivagut -meeqqallu PINNGITSOORATIK peqataatinneqassapput. Ilinniarnerup ingerlanerani paasisat sakkussiissutillu nutaat, meeqqat inuusuttullu kommunimik naapitsineranni illersuisuunissamut piginnaaneqalersissavaatsit, meeqqat inuusuttullu namminneq inuunertik pillugu nutaanik paasisaqarnissamut periarfissaqalerlutillu oqartussaaqataalersinnaalersillugit.

Najortinut peqataarusuppit?

Ilinniagaqarnissamut pisortatigoortunik piumasaqaateqartoqanngilaq. Atorfik naapertuulluarsinnaavoq isumaginninnermi siunnersortinut, sulianik suliaqartunut, perorsaasunut, ilinniartitsisunut allanullu meeqqanut tunngasunik inatsisilerinermilluunniit ilinniagalinnut imaluunniit misilittagalinnut. 

Nunamit tamarmit illersuisartut allat peqatigalugit najortitut suliassanik illersuisartutullu piginnaasaqarfigisariaqartunik ilinniartinneqarlutillu sungiusarneqassaatit.

Atorfik piffissaq tamaat suliffiunngilaq, najortitullu sulissaguit maanna atorfigisavit piffissap ilaani qimakkallalaartarnissaanut periarfissaqarsinnaasariaqarputit.

Najorteqartitsisarnermik aaqqissuussinermut peqataarusukkuit, imminut oqaluttuarilaarlutit uunga mailissaatit: najorti@najorti.gl.

Najortinngussaguit:

  • Oqaasiliullaqqissuullutillu paasisanik ingerlatitsillaqqissuusariaqarputit

  • Meeqqanut inuusuttunullu artornartunik atugaqartunut allanngueqataanissamut piumassuseqartariaqarputit

  • Meeqqat inuusuttullu artornartunik aqqusaagaqartut oqaloqatiginissaannut sapiissuseqartariaqarputit

  • Suliamut tunngatillugu nutaanik ilikkagaqarusuttariarputit pineqartullu iluani periutsit pitsaanerpaat inerisarnissaannut peqataasinnaasariaqarlutit

  • Meeqqat, inuusuttut meeqqanillu peqataatitsineq pillugit isignneriaatsinut nutaanut ammasuusariaqarputit

  • Tamatigut meeqqap isiginneriaasiatut isiginneriaaseqarnissaq

  • Nammineerluni sulisinnaaneq

Najortit  tassaapput inersimasut suliaminnik ilinniagallit makku pillugit akissarsiaqartitaasut:

  • Namminneq isummatik inersimasulluunniit allat isumaat saqqummiunnagit, meeqqamut pitsaanerusussap saqqummiunnera

  • Meeqqap kommunimik naapeqateqarnerani tapersersornera – piareersarnermigut peqataanermigullu

  • Meeqqap suliamik paasinninnissaanik pisariaqarfiatigullu naammagittaalliornissamut periarfissaqarnissaanik ikiorsernera

  • Meeqqap pisinnaatitaaffimminik paasinninnissaanik ikiorsernera

  • Suliap uninngaannarani pissusissamisoortumillu ingerlajuarnissaata qularnaarnissaa

  • Meeqqap meeqqallu isumaasa akuersaarnerat

  • Meeqqap kissaatigisaminik pisariaqartitaminillu ersarissaanissaanik ikiornera