Qitornat “Najorteqarpa”?

Najortip qularnaassavaa meeqqat pisinnaatitaaffiisa eqquutsinneqarnissaat, taamatullu qularnaassallugu meeqqat suliniani imminnut tunngasuni tusarniaavigineqartarnissaat.

Najorteqartitsinikkut aammattaaq qularnaarneqartarpoq sulianik suliaqarnerup meeqqat paasisinnaasaannik ingerlanneqarnissaa.

Najorti meqqanik inuusuttunillu sullissinissaminut ilinniarsimasuuvoq.

Najortip meeqqanut tunngasutigut inatsisit ilisimasaqarfigivai, kommunimilu ingerlatsineq ilisimasaqarfigaluguttaaq.

Najortip suliassaraa meeqqat inuusuttullu inuunerminni artornartunik atugaqartut, tamannalu pissutigalugu kommunimik attaveqartariaqalersut, tapersersornissaat.

Meeraq qitiutillugu suleqatigiinneq

Meeqqap ajornartorsiutai pitsaanerpaamik qaangerneqassappata, pingaartorujussuuvoq illit angajoqqaatut, kommunimi sulisutut susassaqartutulluunniit allatut suliamut akuutinneqartutut, suleqatiginnilluarnissat. Najortip qularnaassavaa, meeqqavit isiginneriaasiata pisinnaatitaaffiisalu ilaatinneqarlutillu eqquutsinneqarnissaat, minnerunngitsumillu qularnaassallugu siunissami angajoqqaat, kommunip susassaqartullu akuutinneqartut allat akornanni pitsaasumik pilersitsiffiulluartumillu suleqatigiinnissaat. Imaanngilaq Najorti kommunip suliamik suliaqarnerani, meeqqanik ilisimalinni allani imaluunniit angajoqqaani kukkunernik tikkuartuillunilu uparuartuissasoq. Najortip qularnaassavaa, meeqqavit suliamut peqataatinneqarnissaa, tusarniaavigineqarnissaa aamma pisinnaatitaaffini pillugit paasitinneqarnissaa.

Najorti suliassai

  • Pisinnaatitaaffiit periarfissallu pillugit ilisimasanik meeqqannut ingerlatitseqqinnissaq

  • Meeqqavit kommunimut attaveqarnerani ikiuunnissaq

  • Meeqqavit kommunimi oqartussaasunilu allani ataatsimeeqateqarnerani tapersersuinissaq

  • Najortip akisussaaffigaa, ataatsimiinnerni oqaatigineqartut meeqqannit paasineqarnissaat aamma isumaqatigiissutigineqartut qanorpiaq isumaqarnerisa siunissamilu qanoq pisoqarnissaata meeqqannit paasilluarneqarnissaat

  • Qularnaassavaa meeqqavit sulianik suliaqarnermi qitiutittuarneqarnissaa, meeqqavillu pisinnaatitaaffiisa eqquutsinneqarnissaasa aammattaaq qularnaassallugu

Kikkut Najortimik pisariaqartitsippat?

Suliamik suliaqarnermi meeqqat pingaarnerpaatinneqarluni qitiutinneqartuassaaq. Najorteqarnissamik kissaateqarneq illit meeqqannit saqqummiunneqassaaq, Najortilu meeqqat sinnerlugu oqaaseqartassaaq – angajoqqaat angajoqqaarsialluunniit sinnerlugit oqaaseqartuunani. Meeqqavit najorteqarnissani kissaatiginngikkuniuk, najorteqartinneqarnissani naaggaarsinnaavaa. Aamma najorteqartitsinissaq naaggaarneqarsinnaavoq, meeraq mikivallaarpat, oqaaseqarpianngippat imaluunniit innarluuteqarpat, tamakkulu pissutigalugit kissaatigisani pisariaqartitaniluunniit oqaatigisinnaanngippagit.

Meeqqat pisinnaatitaaffii

Inatsisit naapertorlugit meeqqat meerajuassaaq 18-inik ukioqalernissami tungaanut. Meeqqat akisussaaffigivat meeqqamullu tunngatillugu aalajangiisinnaallutit. Kisianni qanorluunniit ikkaluarpat, illit meeqqat pingaarutilinnik pisinnaatitaaffeqarpoq, soorlu:

  • Illit angajoqqaatut pingaarnertut akisussaaffigivat meeqqavit isumassornissaa naammaginartunillu inuunermini atugassaqarnissaa

  • Inunnik isumaginnittoqarfiup suliamik suliarinninneranut tunngatillugu meeqqavit ilitsersorneqarnissani tapersersorneqarnissanilu pisinnaatitaaffigivai

  • Tusaaniarneqarnissamut pisinnaatitaaffeqarneq isumaqarpoq aalajangeeqataanissamut pisinnaatitaaffeqarneq­ – imaanngilaq meeqqap aalajangiiffigisassat aalajangiiffigissagai

  • Illit akuersinerit tunngavigalugu, meeqqat kommunimi ataatsimiinnerni meeqqavit najorteqarnissani pisinnaatitaaffigaa

  • Meeqqavit timikkut tarnikkullu persuttagaanissamut illersorneqarnissani pisinnaatitaaffigaa.